மேஜிக் கற்றுக் கொள்ளுங்கள்.

புதிர்கள் சில:

2004-11-13T13:16:00.000+05:30

அதை வாங்கியதும் வெளிப்புறத்தை துாக்கி எறிந்து விட்டு உட்புறத்தை சமைக்கிறோம். சமைத்த பிறகோ வெளிப்புறத்தைச் சாப்பிட்டு விட்டு உட்புறத்தைத் துாக்கி எறிகிறோம். அது என்ன?
வாங்கும் போதோ அது கருப்பு வண்ணத்தில் இருக்கிறது. பயன்படுத்தும் போதோ சிவப்பாகிறது. பயன்படுத்திய பிறகு துாக்கி எறியும் போதோ வெணமையாய் இருக்கிறது. அது என்ன?
அதன் பெயர் சொன்னாலே உடைந்து காணாமல் போகும் மென்மையான அது என்ன?
சென்னையில் உள்ள மருத்துவரின் தம்பி கோவையில் வழக்குரைஞராக இருக்கிறார். கோவையில் உள்ள அந்த வழக்குரைஞரின் அண்ணன் சென்னையில் மருத்துவராக இல்லை. இது எப்படி முடியும்?
அது ஓடும் ஆனால் நடக்காது. தலை இருக்கும் அழாது படுக்கை இருக்கும் துாங்காது. எது?
எல்லாவற்றுக்கும் தொடக்கம் எது? முடிவு எது?
அந்த மின்சாரத் தொடர்வண்டி மணிக்கு 70 கி.மீ வேகத்தில் தென்மேற்குத் திசையில் ஓடிக் கொண்டிருக்கிறது. அப்போது காற்று வடகிழக்குத் திசையில் 70 க,மீ வேகத்தில் வீசுமானால், வெளிப்படும் புகை எந்தத் திசையில் செல்லும்?
மூன்று அடி ஆழம் ஆறு அடி விட்டத்தில் ஒரு பள்ளம் தோண்டுகிறீர்கள். அதில் எவ்வளவு மணல் இருக்கும்.
25லிருந்து 5ஐ எத்தனை முறை கழிக்கலாம்?
அந்தப் பெண்ணின் இரண்டு பையன்களும் ஒரே ஆண்டில் ஒரே மாதத்தில் ஒரே மணிப் பொழுதில் பிறந்தவரகள். ஆனால் அவர்கள் இரட்டையர் அல்ல. இது எப்படி சாத்தியம்?
1985ல அவனது வயது 15. 1990ல் அவன் வயது 10. இது எப்படி சாத்தியம்?
எப்போதுமே தவறாக உச்சரிக்கப் படும் சொல் எது?
மேலே செல்லும் கீழே வரும். பக்க வாட்டில் நகராது. எது?
கூடையிலே மூன்று பழங்கள். இரண்டை எடுத்துக் கொள்கிறீர்கள். உங்களிடம் எத்தனை இருக்கும்?
அது உங்களுக்குச் சொந்தமானது. ஆனால் அதைப் பிறர்தான் அதிகம் பயன்படுத்தகிறார்கள். பிறர் அதிகம் பயன்படுத்துவதில் தான் உங்களுக்கும் மகிழ்ச்சி. அது என்ன?

புதிர் விடைகள்:
1. சோளம்.
2. நிலக்கரி
3. அமைதி (மெளனம்)
4 சென்னையில் இருப்பவர் அக்கா
5. நதி
6. தொடக்கம் 'எ' முடிவு 'ம்'
7. மின்சாரத் தொடர்வண்டியில் புகையா?
8. மணலை எடுத்தால் தானே பள்ளம்? பள்ளத்தில் காற்றுத்தான் இருக்கும்.
9. ஒரே ஒரு முறை. அதன் பிறகு அது 20 ஆகி விடுமல்லவா.
10. அவளுக்குப் பிறந்த மூவர் (அல்லது நால்வரில்) இருவர் அவர்கள்.
11.கிறித்துவிற்கு முன் சாத்தியம்
12. 'தவறாக'
13. வெப்பநிலை
14. இரண்டு
15.உங்கள் பெயர்

கண்ணால் வெட்டப்பட்ட வாழைப்பழம்.

2004-11-13T13:14:00.000+05:30

தேவை : வாழைப்பழம், ஊசி.
செய்முறை : ஒரு வாழைப்பழத்தை எடுத்து அதை ஊசியால் சரியாக நடுப்பக்கத்தை சுற்றி குத்த வேண்டும். (அல்லது நீண்ட ஊசி ஒன்றை எடுத்து பழத்தின் நடுப்பகுதியில் நுழைத்து அதன் பின்புறத்தை மெதுவாக அசைத்து பழத்தை வெட்ட வேண்டும்.) ஊசியை எடுத்த பிறகு பார்வையாளர்களை அழைத்து "நான் இப்பொழுது கண்களால் இந்த வாழைப்பழத்தை வெட்டப்போகிறேன்" என்று சொல்லி வாழைப்பழத்தோலை உரிக்க வேண்டும். உரிக்கும் பொழுதே பார்வையாளர்களிடம் 'என் கண்களைப் பாருங்கள் - இதோ கத்தி போல் கூர்மையாகிறது - பழத்தை வெட்டப்போகிறது' என்று கூறிக்கொண்டே வாழைப்பழத்தோலை உரிக்க வேண்டும் வாழைப்பழத்தோலை உரித்த உடன் வாழைப்பழம் கீழே விழும். இதைக் கண்ட பார்வையாளர்கள் வியப்படைவார்கள்.
.. சின்னப்பையன்

எழுமிச்சை இரத்தம்.

2004-10-17T09:39:00.000+05:30

தேவை : எழுமிச்சம் பழம், சிவப்பு மை (ரெட் இன்க்), கத்தி, ஊசி (சிரின்ஞ்).

செய்முறை : ஒரு எழுமிச்சம் பழத்தை எடுத்து அதில் சிவப்பு மையை ஊசி மூலம் உள்ளே செலுத்த வேண்டும்.பிறகு பார்வையாளர்களை அழைத்து " நான் இப்பொழுது எழுமிச்சம் பழத்தின் இரத்தத்தை காட்டப்போகிறேன்" என்று சொல்லி மந்திரம் போடுவது போல் கத்தியால் எழுமிச்சம் பழத்தை வெட்ட வேண்டும். எழுமிச்சம் பழத்தில் இருந்து சிவப்பு மை வரும் இதைக் கண்ட பார்வையாளர்கள் இரத்தம் என்று நினைத்து வியப்படைவார்கள்.

கூத்தாடும் எலுமிச்சை.

2004-10-10T17:13:00.000+05:30

தேவை :எலுமிச்சம்பழம் ஒன்று, மெழுகு, பாதரசம் (மெர்க்குரி).

செய்முறை : ஒரு எலுமிச்சம்பழத்தை எடுத்து அதில் பல துளை இட்டு பாதரசத்தை கொஞ்சம் கொஞ்சமாக உள்ளே செலுத்தி துளையை மெழுகினால் மூடி. வெய்யிலில் போட்டுவிட்டால், சூடேற சூடேற எலுமிச்சம்பழம் குதிக்கும். உருண்டு ஓடும். பார்க்க
வேடிக்கையாக் இருக்கும்.

எச்சரிக்கை: பாதரசம் நிறைந்த இந்த எலுமிச்சை நச்சுத் தன்மை உடையது. மிக ஆபத்தானது. வேடிக்கை காட்டி முடிந்ததும் யாருக்கும் கிடைக்காதபடி இந்த எலுமிச்சையை அழித்துவிட வேன்டும்.

செம்பில் பால் வரவழைக்க.

2004-09-27T18:32:00.000+05:30

தேவை : பால், தூய வெள்ளைத் துணி, செம்பு, தண்ணீர்.

செய்முறை : பாலை எடுத்து அதில் வெள்ளைத் துணியை நனைத்துக் வெய்யிலில் காய வைக்க வேண்டும் இவ்விதம் ஒரு ஆழாக்குப் பாலை துணியில் ஏற்ற வேண்டும்.

பிறகு வேடிக்கை பார்க்க நிறைய சிறுவர்களை அழைத்து, இப்போது தண்ணீரைப் பாலாக மாற்றிக்காட்டப் போகிறேன். உங்களால் முடியுமா என்று சவால் விட்டுப் பேசிக் கொண்டே ஒரு செம்பில் சிறிது தண்ணீர் எடுத்துக் காட்டவேண்டும்.

பிறகு அவர்களிடம் பேசிக்கொண்டே தண்ணீரில் துணியைப் போட்டு சிறிது நேரம் கழித்துப் பார்த்தால் செம்பிலுள்ள தண்ணீர் பாலாக மாறி இருக்கும்.

இலையின் நிறம் மாறுமா.

2004-07-24T19:59:00.000+05:30

தேவை : செடி (வெங்காயச் செடி, சூரியகாந்திச் செடி அல்லது போகன்வில்லாச் செடி) ,கிண்ணம்,சிவப்பு மை(INK).

செய்முறை :கிண்ணத்தில் சிவப்பு மையை சிறிது ஊற்றவும். பிறகு அதில் செடியை வைத்து சிறிது நேரம் சூரிய வெளிச்சத்தில் வைக்க வேண்டும்.சிறிது நேரத்தில் இலையின் நரம்பு சிவப்பு நிறமாக மாறியிருக்கும்.

விளக்கம் :வேர் முலம் நீர் உரிஞ்சப்பட்டு மற்ற இலை தழைகளுக்கு தரப்படுகிறது. நாம் சிவப்பு மையை நீரில் கலந்ததால் அது வேரால் உறிஞ்சப்பட்டு இலைகளுக்கு தரப்பட்டுள்ளது அதனால் இலையின் நிறம் மாறியிருக்கிறது

கூண்டுக்கிளி-பாகம் 2

2004-07-04T08:23:00.000+05:30

விளக்கம் : ஒரு பொருளை நாம் பார்க்கும்போது அதிலிருந்து வரும் ஒளிக்கற்றை நம் விழித்திரையில்
விழுகிறது இதனால் ஏற்படும் பிம்பம் சிறிது நேரத்திற்கு விழித்திரையில் நிலைத்து இருக்கிறது அதற்குள் வேறு பொருளை நாம் பார்த்தால், நம்மால் இரண்டு பிம்பங்களும் சேர்ந்த கலப்பு பிம்பத்தை உணர முடிகிறது.

கூண்டுக்கிளி.

2004-06-26T19:57:00.000+05:30

தேவை : ஒரு அட்டை,எழுதுகோல், (மத்தாப்புக்) கம்பி.

செய்முறை : ஒரு அட்டையில் ஒரு பக்கத்தில் ஒரு கிளியும் மறு பக்கத்தில் கூண்டும் வரைய வேண்டும். பிறகு அட்டையை சிறிது பிளந்துகொண்டு கம்பியை நடுவில் வைத்துவிட்டு அட்டையை முன்பு இருந்தது போல ஒட்டவேண்டும். இப்பொழுது கம்பியை பிடித்துக்கொண்டு அட்டையை வேகமாக சுழற்ற வேண்டும். உடனே கூண்டிற்குள் கிளியிருப்பது போலத் தெரியும்.

ஆனால் கூண்டிற்குள் கிளியிருப்பது போல சுழற்சி நடக்கும் போது மட்டும்தான் தெரியும். ஏன் என்று நீங்கள் சொல்லுங்கள் அல்லது அடுத்த பதிவில் நான் சொல்கிறேன்.

தொடருவேன்.

அன்புடன் சின்ன பையன்.

சதுரங்கம் விளையாடலாம்.

2004-06-21T20:55:00.000+05:30

சதுரங்கம் விளையாடலாம்.

சதுரங்கம் விளையாடுவது எப்படி என்று நான் இங்கு சொல்லவில்லை ஆனால் அதை கற்றுக் கொள்ள ஒரு தளத்தின் பெயரை இங்கு தரப் போகிறேன்

பலூன் வெடிக்குமா?

2004-06-12T21:18:00.000+05:30

தேவை : ஒரு பலூன், செல்லோ டேப், குண்டூசிகள்.

செய்முறை : பலூனை ஊதிக் கொண்டு அதன் மேல் செல்லோ டேப்பை ஒட்டி விட வேண்டும். இப்பொழுது பார்வையாளர்களிடம் பலூனை காட்டி "இதை குண்டூசிகளால் குத்தினால் வெடிக்காது" என்று சொல்ல வேண்டும். அதன் பிறகு டேப் ஒட்டின இடத்தில் குண்டூசிகளை குத்த வேண்டும்.பலூன் வெடிக்காது.

குத்திய ஊசியை அப்படியே வைத்திருந்தால் காற்று வெளியேறாது. ஊசியை எடுத்து விட்டால் காற்று வெளியேறி பலூன் சிறிதாகும். ஆனால் வெடிக்காது. செல்லோ டேப் ஒட்டாவிட்டால், ஊசி குத்தும் போது சிறிய துளை வழியே நிறையக் காற்று வெளியேறுவதால் பலூன் கிழிந்து உடைகிறது. செல்லோ டேப், பலூன் இவ்வாறு கிழிவதைத் தடுக்கிறது.

எச்சரிக்கை : செல்லோ டேப் ஒட்டியிருப்பது யாருக்கும் தெரியக் கூடாது.

மாய இரத்தம்

2004-06-06T06:42:00.000+05:30

தேவை : மஞ்சள் தூள்,வெள்ளைத்தாள்,சுண்ணாம்புத் தூள்,தண்ணீர்.

செய்முறை : உங்கள் நண்பரிடம் மாயாஞாலம் செய்து காட்டும் முன்னே மஞ்சள் தூளை தண்ணீருடன் கலந்து வெள்ளைத்தாளின் மீது தடவவேன்டும். தாள் மஞ்சள் தாளாகி விடும்.

அதே போல் சுண்ணாம்புத் தூளை தண்ணீரில் கலந்து கையில் தடவிக்கொள்ள வேண்டும்.

இப்பொழுது இந்த மங்களகரமான மஞ்சள் தாளிலிருந்து இரத்தம் வரவழைக்கப் போகிறேன் என்று சொல்லிக் கொண்டு மந்திரம் போடுவது போல் கையை தாளின் மீது வைக்க வேண்டும். உடனே சிவப்பு நிறம் உண்டாகும் அதை இரத்தம் என்று சொல்ல வேண்டும்.

எச்சரிக்கை : கையில் சுண்ணாம்புத் தூள் தடவியிருப்பது யாருக்கும் தெரியக் கூடாது.

காசை அழும்படி செய்யலாம்.

2004-06-02T22:09:00.000+05:30

தேவை : காசு, பஞ்சு, தண்ணீர்

செய்முறை : பார்வையாளர்களுக்குத் தெரியாமல் பஞ்சை முன்னதாகவே தண்ணீரில் நனைத்து காதின் பின்புறம் வைத்துக்கொள்ள வேண்டும்.

பிறகு காசை உள்ளங்கையில் வைத்து கொண்டு அனைவரிடமும் காட்ட வேண்டும். இப்பொழுது கையை காதிடம் கொண்டுபோய் மந்திரம் போடுவது போல பேசிக்கொன்டே பஞ்சை அழுத்த வேண்டும். உடனே தண்ணீர் கொட்டும். காசு அழுகிறது என்று பார்வையளர்களிடம் சொல்ல வேன்டும். திறமையாக செய்தீர்கள் என்றால் அவர்கள் நம்பித்தான் ஆகவேன்டும்.

வேடிக்கை: தண்ணீரில் உப்பும் சேர்கலாம். சுவைத்துப் பார்த்து அவர்கள் கண்ணீர் என்றே ஒப்புக் கொள்ளக் கூடும்

மாய எழுத்துக்களை வரவழைக்கலாம் வாங்க!

2004-05-30T07:34:00.000+05:30

தேவை : ஒரு எழுதும் தாள், சோப்பு, தண்ணீர்

செய்முறை : தாளில் சோப்பை வைத்து உங்களுக்குத் தோன்றுவதை எழுதுங்கள்.பிறகு உங்கள் நண்பரிடம் இந்தத் தாளில் உள்ள ரகசியத்தைக் கண்டுபிடி என்று சொல்லுங்கள். அவர் விழிப்பார். பிறகு நீங்கள் அந்தத் தாளைத் தண்ணீரில் காட்டுங்கள். நீங்கள் எழுதிய எழுத்து தோன்றும். ரகசியம் வெளிப்படும்.

எச்சரிக்கை: சோப்பின் நிறம் பேப்பரில் தெரிய கூடாது வெண்ணிற சோப்பையே பயன்படுத்துங்கள்.

வெறுங்கையில் விபூதி வரவழைக்கலாம் வாங்க.

2004-05-28T12:18:00.000+05:30

தேவை: விபூதி,கற்பூரம்,சாதம் வடித்த கஞ்சி.

செய்முறை: விபூதி, கற்பூரம் இரண்டையும் சாதம் வடித்த கஞ்சியில் போட்டுக் கெட்டியாகக் கலந்து மாத்திரை மாதிரி செய்து காயவைத்து எடுத்துக் கொள்ளுங்கள்.

தந்திரம்: ஒரு மாத்திரையை எடுத்து கொண்டு விரல் இடுக்கில் வைத்து விரலை மூட வேண்டும். பார்வையாளர்களிடம் வெறும் கையை காட்ட வேண்டும் பிறகு கையை ஆட்டி ஆட்டி மந்திரம் போடுவது போல மாத்திரையை பொடி செய்ய வேண்டும் பிறகு அவர்கள் கையில் பொடியை விபூதி என்று சொல்லிக் கொடுக்க வேண்டும்.

எச்சரிக்கை: ஒரு வேடிக்கைக்காகத் தான் .... நீங்கள் போலிச் சாமியார் ஆகிவிடக் கூடாது.

எனது முன்னோடிகள்

2004-05-03T08:52:00.000+05:30

ஆச்சிமகன்,சுரதா, காசி,சங்கர், வெங்கட்,பாரி, செல்வராஜ், சுந்தரவடிவேல் போன்று எத்தனை முன்னோடிகள்! இவர்களது வலைப்பூக்களையும் அவற்றில் புதியவர்களுக்கு இவர்களது வழிகாட்டல்களையும் படித்தறிந்த பிறகு நம்மாலும் வலைப்பூ உருவாக்க முடியும் என்ற நம்பிக்கை ஏற்பட்டதின் விளைவுதான் இந்தப்பூ. இதில் நான் என்னை பற்றியும், நான் கற்றவை,கேட்டவை,பார்த்தவை பற்றி சொல்ல போகிறேன்.

தொடருவேன்.

அன்புடன்
சின்னபையன்

எனது ஏக்கம்

2004-04-25T12:47:00.000+05:30

நான் ஒரு நாள் என் அம்மா உடன் கடைக்கு சென்றேன். அப்பொழுது ஐஸ் மழை பெய்தது நான் வைத்திருந்த குடையில் ஓட்டை விழுந்தது. அதனால் ஒரு கடையின் அருகில் நின்றோம். மழை சற்றும் ஓயவில்லை. சிறிது நேரத்திற்குப் பிறகு நாங்கள் வீடு திரும்பினோம், என் அம்மா வீடு திரும்பும்போது இந்த ஐஸ் மழை பத்தி சொன்னாங்க. இதை காயம் பட்ட இடதில் வைத்தால் காயம் சரியாகிவிடுமாம். உடனே நான் அதை எடுத்து கொண்டேன். நான் ஒரு முறை பார்த்த அந்த மழை மறுபடியும் வரவேயில்லை எனக்கு இப்பொழுது பன்னிரெண்டு வயது தான் ஆகிறது இன்னும் சிறிது காலத்தில் பார்க்காமலா போவேன். ஆனாலும் மழை இல்லாத இந்தக் காலத்தில் ஐஸ் மழைக்கு ஆசைப் படுவது சரிதானா.